2021年3月27日 星期六

十常八九 (深水埗)

 


友人只能放平日,我又只能放紅日,也許相見很難,決定請日大假(平日)相聚一刻,揀左最近人氣日式店子十常八九,其實想去好耐,奈何店子收19:00趕唔切去,今次就趁平日去一轉。(平日去都要留意,逢星期二休息)。
店子開12:00,加上又係平日,初步相信唔會多人(實在太天真喇),12:05去到,原來已經差唔多full,幸好剛有兩位唔洗等。
之後都有幾組客人要等位,職員叫客人可以留電話等有位時再call返個客,呢個服務都幾好,起碼唔洗係門口狂等。









小小的店子,不論門面及內堂都甚有和風之感,裝潢以白色及木系為主調,感覺簡約柔和,門面的落地玻璃滲入自然光線,倍感溫暖。
位子不多,約有4張枱子,容納大約12人,兩台榻榻米(要脫鞋),另一邊係長櫈同兩張枱,每張枱相隔一定距離,有私人空間,人小小,可享受寧靜舒適之感(好想坐榻榻米位)。

和栗蒙布朗的製作過程,忍唔住影左。







主打日式甜品,飲品有抹茶、茶、咖啡及梳打等,甜品都算多選擇,當中的自家甜品十常吐司最想一嚐。

玄米抹茶鮮奶,$45,微微的玄米香,好濃郁的抹茶味,口感較杰身,甘苦味重。
抹茶豆乳,$45,友人的。


和栗蒙布朗,$88,人氣甜品之一,目測每台都有叫(呢款甜品令我想起某件事,不過廢話唔講了,正正經經食甜品),和栗蒙布朗,賣相精緻,仿如一座山丘,以糖漬栗子作點綴,好點題,幼細如絲的栗子蓉,入口細滑輕盈,有淡淡栗子香味而不甜漏,內餡是雲呢拿籽雪糕及蛋白餅,雪糕軟滑,蛋白餅酥脆,層次豐富,估唔到好味!(因個人本身麻麻地栗子甜品,今次係挑機。)

十常吐司,$72,製作需時25分鐘,想食要耐心等待。



吐司賣相似玉子燒,食落口感上都少許似玉子燒(開始懷疑人生)......,味道及口感同法式多士相似,入口柔軟濕潤,味道香甜,配合蜜糖、忌廉及牛油更美味,伴食的生果,焦糖香蕉,感覺有焦糖燉蛋的影子,面層是薄薄焦糖脆,同香蕉的甜味好夾,士多啤梨、藍莓及青提子酸酸甜甜和中下多士甜味。

食物味道不俗,賣相精緻有特色,心思之作,環境舒適,服務態度幾好,價格合理(仲要冇加一),布甸都好吸引,有機再來要一試。

人生不如意十常八九,苦中一點甜,感覺relax。

深水埗黃竹街2號地舖












沒有留言:

張貼留言