Boholic (長沙灣)

近期人氣店-Boholic，波希米亞風格的cafe，見介紹食物不俗環境幾靚打卡之選，田會長都話唔錯，今次一於去試下，book了2人，19:30。

提早少少去到，填埋資料就入去。

餐廳有兩層，上層樓底比較矮，但感覺較有私人空間，有個梳化位係打卡之選。下層樓底高，有空間感，門口有個鞦韆比大家打卡，個鞦韆位係獨立空間唔會影到其他人，呢個設計真係窩心。

裝潢是波希米亞風格，以米白色為主調，四周佈置了不少植物，牆上掛有編織飾物，感覺柔和舒適，有著小清新之感，暖色燈光，感覺 relax。

要了Set Dinner for 2 $428。

本身有諗過散叫，但個Set好似幾抵，即揀左了。

Earl Grey，$30，但夜晚都係唔飲咖啡了，木笙玩物球球泡茶壺，簡約雅緻之感，Mighty Leaf伯爵茶，淡淡的清香，感覺舒泰。

Vanilla Bean，$30，友人的，有微微的雲呢拿味。

北海道刺身帶子西瓜沙律配黑醋汁，賣相有美感﹐配搭夠新鮮﹐帶子的鮮甜、沙律菜的爽脆再配西瓜的清甜，感覺好fresh，中間夾了一片芝士提升口感及味道，酸酸甜甜的黑醋汁，味道清新有特色。

海鮮拼盤，法國藍青口、黃金螺及熟蝦各4件，幾新鮮。

是日餐湯＆自製香草蒜蓉包，蟹肉椰菜花忌廉湯，唔覺有蟹肉，口感幼滑，好奇有少少似洋蔥湯果隻酸味。蒜蓉包不俗。

黑松露野菌忌廉意大利飯，黑松露香氣強烈，味道濃郁，意大利飯有咬口，每啖都好多汁，口感creamy ，幾美味呢。

香煎慢煮澳洲板腱牛扒伴琵琶蝦，牛扒厚身，肉味香濃，肉質軟嫩好juicy，琵琶蝦爽口鮮味。

鮮果芒果泡沫，質感軟滑，味道似芒果布甸味，內有西瓜、士多啤梨及藍莓等酸酸甜甜味道。

伯爵茶戚風蛋糕配黑糖泡沫，$58，最想食呢個，口感軟綿濕潤，有淡淡的伯爵茶香味，配上香甜軟滑的黑糖泡沫，味道不俗呢。

環境靚，坐得舒適，食物味道不俗，同幾抵食呢。

長沙灣福華街561號君凱豪庭地舖及1樓

同場加映，元州邨花隧道，走馬看花。