家賀屋刺身寿司專門店

東京之旅結束不久，又掛住日本的美食了，即興相約港島之友一齊去食日本野，友人介紹了一間主打刺身壽司的店子，被他的吞拿魚腩吸引了，地點竟在公司的附近，咁方便，就豪一餐啦。

店內環境寬敞，有個人空間，裝潢是日式西餐廳的設計，歐式復古枱椅，不修飾的灰牆身，帶點型格味道，牆上掛有日本畫像，擺放了日系精品，不失日本的風情。

大吞拿魚腩，$200，豪一次呀。

5片的大吞拿魚腩，賣相好吸引，呈粉紅色的魚肉，脂肪分佈明顯，十分肥美，入口魚香味濃，口感油潤軟滑，好美味呀。

特選海鮮丼，$195，有磯燒小鮑魚、大吞拿魚腩、特上三文魚籽、蔥吞拿魚腩、海膽、特大赤海蝦、日本帆立貝、赤貝、油甘魚、左口魚裙邊、吞拿魚及三文魚腩，甚有份量，一次過試晒咁多款刺身，魚生夠新鮮，海膽鮮甜幼滑，蔥吞拿魚腩甘香鮮味，磯燒小鮑魚，肉質彈性，味道清甜，好味呀。

特選海鮮丼入面的特大赤海蝦，果然好大隻，味道鮮甜爽口，好味呀。

日本帆立貝壽司，特價每件$10，見咁平即叫了，豐厚的帆立貝，味道鮮甜，好味呀。

明太子雞翼，$35。

雞翼入面釀滿了明太子，味道鹹香惹味，幾好食呀。

有水準的日本店子，食物夠新鮮，環境有個人空間坐得舒適，服務態度親切，豪食左大吞拿魚腩，好滿足呀。

灣仔灣仔道83號1樓