点心代表 x Little Twin Stars

夜晚去左尖沙咀行下,差唔多9:00,仲未食飯,見点心代表冇乜人,little twin stars點心又好可愛,於是就試下了。

之前的蛋黃哥熱潮,仍有精品售賣中呀。

裝潢冇乜特色,只係貼左little twin stars海報同售賣一些精品,環境擠迫,枱椅密集,坐得不太舒服。

必試 Little Twin Stars 點心。

Little Twin Stars的茶具好靚呀。

茶位$10,要了玫瑰普洱茶,是用茶包的,冇乜玫瑰味之餘,連普洱味都欠奉,明明茶色好深,都冇乜茶味呀。

鮮蝦蒸腸粉,$49。

好在本身不是fans,如果唔係一定好唔開心,賣點是little twin stars,卻公仔冇左半邊面,太hea了啦,完全冇誠意。

講下個腸粉,皮厚,饀唔係全部用鮮蝦,有一半係蟹柳,一半係鮮蝦,感覺偷工減料,味道普通。

蒸奶皇流沙包,$49。

賣相好可愛呀,印有公仔,冇走樣,微熱,個包硬左點,好豐富的流沙餡,味道香甜,咁多款點心當中比較好果款了。

彩色蝦餃$59。

賣相不俗,粉紅及粉藍色都好可愛呀,入面好大粒鮮蝦,都幾爽口,不過冇鮮味呀。

燉奶椰皇,$69,個賣相幾靚,餐碟都好靚,微熱,有椰香味,少甜,味道正常水準。

蟲草花鮮雞飯,$45,個飯要追單先上,個飯睇落份量多,實際籠底好淺,份量少,面層的麵條好似像筋咁彈,冇味的,雞肉同飯味道正常水準。

難得拎到little twin stars做賣點,好心唔好咁hea啦浪費左,環境冇咩心思,食物一般,服務態度有點亂,唔知中環分店係味同一情況呢。

尖沙咀彌敦道100號The ONE 3樓L308號舖