七福神和食亭

久違了的每月一餐聚會，因疫症之下變了每年一餐...難得見下面呢，友人想食日本野，大家最後揀了七福神和食亭，thank友人訂位。

店子面積中等，以木系為主，日式設計，佈置了不少飾物，坐的是梳化椅，尚算舒適。

餐牌，食物選擇頗多，友人發板。

蟹籽沙律(細)，$52，大熱天時最好就係食個沙律，清涼一下，同食多點菜，好大碗沙律呢，味道清新。

枝豆，$35，大家鍾意食，佐酒之選，邊飲野邊食邊吹水。

八品刺身盛合，$328，三文魚、金目鯛、油甘魚、八爪魚、帶子、北寄貝、甘蝦(各三件)及海膽(半板)，十分吸引的組合，刺身尚算新鮮，味道正常水準，太耐冇食刺身之下感覺好滿足。

金目鯛另上。

鎌倉壽司拼盤(18件)，$238，份量豐富，味道正常水準。

什錦蝦天婦羅，$75，尚算炸得乾爽脆身，入口唔會太油，但味道普通。

露笋牛肉串，$58，香口惹味。

花魚一夜干，$88，呢個要趁熱食，香口魚肉滑，不俗。

伏特加薯蓉海鮮湯配墨西哥餅，$108，幾有特色的一道菜，墨西哥餅口感薄脆有魚香味，薯蓉海鮮湯杰身creamy，少許酒香，有蜆及蝦等的海鮮，還不俗呢。

荔枝香桃梳打，$38，唔太甜，清涼之感。

紫蕃薯鮮忌廉奶昔，$48，田會長的。

食物正常水準，坐得幾舒服。

佐敦彌敦道311-313號1樓