創意廚房

晚上轉折之下來到荃灣，順便食埋飯，本身想食果間拉麵有排排唔知要等幾耐，心灰意冷之下荃灣之友推介了一間台式自家制風味餐廳，話幾好味又抵食，個老闆仲要好過癮，反而好奇左個老闆有幾過癮(竟然)之下去食了，去到富利達中心果頭搵左陣見到間店，門面看似豪不起眼，但其實內有乾坤。

大約8點多時段，唔算太多人，小小的店子，長方形格局一目了然，簡約實用設計，牆上貼有食物相、餐牌、一些可愛的小佈置擺設及樂器(唔通有表演?)，簡單得來有心思，有自助加料及斟水區，又有電視睇，好自在，有種家的感覺。

餐牌，都幾多選擇，價格都比較平。

坐底點左野食，老闆好親切，問要唔要湯，係愛心湯，講野好攪笑，有時仲會來吹下水。

蕃茄南瓜湯，是日晚餐靚湯，竟然有湯飲，太窩心了，味道酸酸甜甜，內有蕃茄及瘦肉，好足料，普通但又好飲呢種感覺.......係愛呀哈利。

珍珠奶茶，飯麵送特飲一杯，奶茶甜度適中，珍珠煙韌，味道不俗。

醬燒豬頸肉燥飯，$48，見幾特別即試下，豬頸肉及肉燥份量多，一片片差不多正方形的豬頸肉食得方便，口感有點似串燒，醬汁豐富似沙嗲，配合肉燥，每啖都香口惹味幾好食，既是台式又有東南亞家味道，果然有創意，冇改錯名。

物味道不俗，仲要好抵食，$48有飯有珍奶有湯，環境感覺舒服，老闆親切，內人情味，下次會再來呀。

荃灣德海街18號富利達中心地下B舖