達人烤肉

約了Yan出來拎手信,天氣又凍左好多了,想食暖野,諗返成日經過此店,今次一於去試下,book左8:00,2位。

平日的8:00,不算是太多人。

面積頗大的店子,樓底高,有空間感,相對之下空調都好少少,加上長煙囪抽氣管,唔會一身都油煙味,汽油桶椅是空罐來的,可以放私人物品,牆上貼有韓星海報,播著韓國歌,而且店員多是韓國人,充滿韓國風味。

坐底不一會,店員即送上前菜及醬料,泡菜蠻不俗。

還有生菜及沙律。

和大部分韓燒店都相同的,爐邊有芝士粟米粒、蛋漿及洋葱蒜片,不過呢間勝在冇太大火烤燶底,可以食都滑溜的蛋呀。

棉花糖青檸檬蘇打,$55,賣相吸引不少女子,上層是棉花糖雲,下層的綠色蘇打,太可愛了,青檸檬味,有清新的感覺呀。

棉花糖西柚蘇打,$55,Yan的,是西柚味的,試了點,都不俗呀。

火五花腩肉,$120,上網見到好多人都食,加上特價,一於試下,呢碟五花腩肉都幾大制作,有專人幫手燒,感覺被重視同好似睇表演。

開始點火。

再擺去爐到繼續燒。

燒到咁上下開始剪成一塊塊,食得更方便。

完成了,即食,厚身的五花腩肉,肥瘦層次分明,油潤又香口,配上爽口的生菜伴食效果更佳。

特牛肋骨肉,$200。

有專人幫忙剪開。

剪成2大片再燒。

邊燒邊剪。

牛肋骨肉,口感鬆化,牛肉味濃好惹味呀。

達人護心肉,$150,已經係一舊舊,可自己燒呀。

護心肉,味道濃郁有咬口,好食呀。

冬日食韓燒特別滋味,呢間環境有特色,有空間感坐得幾舒服,食物有水準,最值得一讚的是某些肉類有專人幫忙燒的服務,岩晒我呢種成日燒燶野的輪盡人仕,有達人燒埋可以食到美食唔洗浪費,滿足左我呢個食肉獸呀。

尖沙咀柯士甸路20號保發商業大廈地舖