渝痴漁醉

放工約了友人食飯，平平地想食10餸飯，據聞每位$58任食1小時仲要有蠔餅食(友人Lunch食過)，仲要全日供應，見咁抵想試。
19:30好多人等位，原來晚市有做火鍋放題，每位$128，任食90分鐘，個放題都有10餸飯嘅野食，諗左陣轉軚食火鍋。

餐廳面積中等，坐位細比較擠迫。

左半個鐘到有位，入座後好快落左單，但遲遲都未有爐，催左幾次唔係叫等等就係聽左冇理，真心差!你做火鍋放題個爐咁慢先上冇得食係味想呃9人!

最後等左差唔多成半個鐘先有爐，職員都有講唔好意思同時間由上爐先開始計返，算數!

入座時即出去睇下有咩食，10餸飯自助區，唔知係味夜市的關係，種類唔算好多，又冇蠔餅。

火鍋自助區，食物選舉唔算好多，數款肉類，其他都係丸同腸多，同蔬菜。

飲品種類有正常。

火鍋要了原味椰子雞煲，個湯底有椰子清甜味，但鹹左少許，雞肉份量正常。

鹹蛋黃雞翼，雞翼夠大隻，味道香脆鹹香惹味，最受歡迎同時又好快冇晒又冇refill，清蒸金鯧魚、蒸雞及韭菜豬紅都不俗，有埋臘味飯及老火湯，仲要有冰糖銀耳蓮子糖水，都幾正。

肥牛肉質普通。

呢區來計都真係幾抵食，食物質素對得住個價，係衰係人手不足上菜太慢，食食下都見到有幾台催單同頂唔順走人，呢個真係太趕客，要改善。

銅鑼灣記利佐治街1號金百利廣場8樓R1號舖