小點角落 Bite By Bite

上網見到小點角落的介紹，主打精美版港式街頭小食及創意菜式，幾有特色好奇一試。


餐廳有兩層，裝潢走文青風格，下層配色上感覺明亮，我們二人坐下層。

上層樓底較矮，但感覺有個人空間。

餐牌，本身想散叫，但見有假日午市套餐，+$18可追加沙律/餐湯 + 咖啡或茶(無限添飲)，餐湯仲可轉碗仔翔，咁抵食就揀左午餐及追加，同叫左個人氣之選小食。


麥皮蝦芒果沙律脆筒，$78。

人氣之選，店員建議一口麥皮蝦一口芒果沙律脆筒的食法，麥皮蝦口感外酥脆乾爽，蝦肉大件爽口有鮮味，配上酸酸甜甜的芒果沙律脆筒，味道清新有層次，美味。
(因為張枱較細，店員加多左個木架我地放飲品，好窩心呢。)

熱咖啡，好大杯，仲可以無限添飲，味道不俗。

餐湯-碗仔翅，成件事好港式，十分足料口感濃稠，幾好味。

香煎盲鰽配蕃茄意大利飯，$98，蕃茄意大利飯口感creamy有咬口，酸酸甜甜幾開胃，魚肉嫩滑，加上有青口感覺豐富。

寶雲酥柚子厚豬扒，$108，好大件豬扒，口感微脆肉質鬆化，有柚子的清新香氣，薯角香口，味道不俗。

食物有創意，而且幾好味，坐得舒適，價格合理，服務態度值得一讚，店員夠細心，亦會主動介紹特色食物，感覺Nice，食好野吹下水放鬆的一天。

旺角白布街2-24號藝興大廈地下4號舖