壽司郎

某日有野買要到長沙灣一轉，順便約長沙灣之友食飯，揀了壽司郎，記得對上食壽司郎已係上年既事(佐敦店)，短短日子已開了不少分店，印象上平，食物幾好同抵食，講起來呢間店位置都幾正，對住戲院，感覺好方便，因友人已預先拎飛，放工去到時等了5-6分鐘即可入去了，thank友人呢。

我地2人，坐卡位，比較舒適。

壽司價格：紅($12)、銀($17)、金($22)及黑碟($27)，另有其他小食及甜品。

用餐時間1小時，加上太肚餓，即叫野食。

海膽海苔包，$17，呢個價幾抵食，味道唔算太鮮甜，比較澀，但唔算太腥。

炙燒赤蝦，$12，好大隻蝦，爽口幾鮮甜。

蔥花吞拿魚軍艦，$12，個人必食，因為幾平，吞拿魚碎油潤柔軟又香口美味。

吞拿魚山藥泥軍艦，$17，見到山藥泥，好奇一試，山藥泥口感綿密帶點清新呢。

厚切黃鰭吞拿魚，$12，正常水準。

昆布漬比目魚，$12，肉質爽口，有昆布漬提升魚的鮮味。

螢光魷魚沖漬，$17，賣相幾吸引，魷魚爽口，但都幾鹹。

鰻魚海苔包，$12，味道甘甜都不俗。

牛油果熟蝦，$12，清新。

太耐冇得食壽司，滿足的一餐呢。

長沙灣長沙灣道680號麗新商業中心地下G38號舖