Happy Friday，約了友人到The Cheesecake Factory食飯，美國菜，以Cheesecake出名，其他食物都不俗，即想試下了，因冇book位，要早點去等，友人在尖沙咀返工，放工6點幾去到，都已經好多人等位了~果然好受歡迎(加上星期五)，預計等候時間約90-100分鐘，因唔太肚餓，一齊照等了。
等位時會派呢部機比你，著燈即係有位，因怕驚行太遠接收唔到，大多數都係門口到等。
等待中順便睇定食咩好，十分多選擇，已揀好食咩了。
等了大約小時再看一下menu。
年輕人，究竟有乜野動力驅使你要等咁耐都仲肯等落去呀?係愛定責任呀?係太想食呀!真係考驗我真愛(竟然冇放棄)，真係等左90分鐘先入到去，破左個人等候紀錄，同時覺得預計既時間都好準。
餐廳環境頗大，設計是懷舊歐陸式的風格，燈光昏暗，感覺有氣氛。
有吧枱及電視。
等你等到我堅餓，坐抵唔洗點睇即叫野食。
餐包，個包幾好味。
獨家檸檬凍飲，$52，清香的檸檬味，好解喝又爽朗。
炸芝士通粉球，$128。
似乎是人氣之選，炸芝士通粉球，咬落香脆，內裡是芝士通粉，口感豐富， 芝士味恰到好處，配意式番茄忌廉醬更好味呀。
香辣路易斯安娜雞肉蝴蝶粉，$186。
好大碟，份量十足，路易斯安娜雞肉有4件以上，仲要大件，入口十分香脆，炸得不油膩夠乾身，味道香口，蝴蝶粉份量多，口感煙韌，配上蘑菇、辣椒及紐奧良醬汁，唔太辣，好惹味呀。
原創芝士蛋糕，$72，硬芝士蛋糕，濃郁的芝士味，好美味呀。
要惜食，一於打包。
芝味無窮的一餐，不枉等咁耐，食物有水準，大大件好抵食，環境坐得舒適，服務態度幾好，有下次呀，上網見到好似有得book位，一於搵日試打去問先。
尖沙咀廣東道25號海港城港威商場地下G102號舖
沒有留言:
張貼留言