Farm Kitchen Vegi~

桂的生日飯,之前聽佢提過Farm Kitchen Vegi,係一間以健康概念為主的日式西餐廳,食的是日西料理,主打以新鮮蔬菜作菜式,而食材大部份係由日本進口,推行少肉多菜,輕食主義。dinner buffet $298 ,book了6位,7:30-11:30,可以話係冇限時了。

門面及環境周圍都擺放花草樹木,用的是木枱椅,樓底好高,感覺好有空間,整體有大自然的感覺。

開放式廚房設計,本身都不錯,不過成日發出蒸氣攪到周圍煙...空調唔夠變得有點熱,幸好空間大樓底高,好快散左d蒸氣。

任食,款式並不多選擇,但每道都很特別,日西式料理,全日式料理都有,雖然有炸物,但大部份都不油。

個場有任食沙律吧,好多款式的新鮮蔬菜。

幾款沙律醬任均選擇。

田園沙律,清新又健康。

雜菜蕃茄湯,濃郁蕃茄味,酸酸地。

洋蔥湯,面層有少少芝士,好香口,湯入面有塊麵包,洋蔥湯浸晒入麵包,食落林林地好入味。

壽司,必食,都新鮮,特別是三文魚、吞拿魚,熟蝦及蟹肉乾了點。

北寄貝沙律壽司唔錯。

吞拿魚薄切伴牛油果甜辣汁,味道酸酸甜甜戴,少少辣,幾醒胃。

燒三文魚露荀沙律伴溫泉蛋大葉汁,三文魚新鮮,沙律配上溫泉蛋汁,味道 fresh。

溫泉蛋忌廉意粉,香口又creamy,幾好食。

熟三文魚,口感硬,味道有點腥。

是日炙燒料理,燒生牛肉刺身,牛肉味濃,不過口感韌左少少。

炸雜菜魚餅,彈牙又好味。

炸咖喱牛蒡條,最近先認識牛蒡係健康食物,炸的牛蒡,食落唔油,配上唔辣的咖喱汁都唔錯。

炸野....唔記得叫咩名....食左好少呀。

吉烈忌廉蟹肉枝豆,雖然係炸,不過唔油,入面少少的忌廉蟹肉及枝豆餡,唔漏又好味。

焗甜蓄茄海膽燴飯,幾好味呀。

燒漢堡,厚厚肉,配上燒汁更惹味。

蒸雜菜,賣相色彩繽紛,好健康。

coffee tiramisu,唔太濃郁咖啡味,不過味道上都ok,雪芳蛋糕唔夠鬆軟。

布甸配芒果汁,係豆腐布甸,幾滑都唔錯。

食物味道上大部份偏淡,但不失清新,食材夠新鮮,味道都好點,加上少肉多菜,食飽唔會漏同滯,健康又唔錯呀。

尖沙咀金馬倫道33號The Cameron 2樓