餃掂手工餃子雲吞專門店 (太子)

隨着餃子店林立，除左平靚正外，都要講噱頭，各有特色及賣點，今次友人推介餃掂，主打多款口味餃子，當中的招牌龍鳳松茸豬肉餃，有黑松露及白松露兩款口味，感覺貴氣。呢間店子都有唔少分店，就腳之下到太子食順便行下。

以餃子店來講，店子面積頗大，以木系及白色為主調，簡潔明亮。

平日夜晚大約8:30去到，唔算太多人。

餐牌，餃子有多款口味，有煎餃及湯餃選擇，一場來到必食龍鳳松茸豬肉餃，仲想試埋其他，太多口味之下都要諗左一陣先揀到。

湯餃及煎餃都試下，煎餃即叫即整需時至少20分鐘。

堂食送上的酸蘿蔔，酸酸地又爽口幾醒胃。

蜂蜜檸檬薏米，$20，味道清新醒神。
自家製山楂雪梨水，$20，友人的。

雙拼湯餃，$55。

要了韮菜豬肉餃及芫茜豬肉餃，餃子賣相飽滿，皮薄內餡十足，韮菜豬肉餃味道香味濃郁，芫茜豬肉餃清香味，狀元九鼎湯底，味道清清地幾鮮甜，有啖湯飲下都幾好。

龍鳳松茸雙餃(8隻)，$98，有黑松露及白松露各4隻，

要了煎餃，餃子大件，外皮香脆有焦香味，內餡十分料足，松茸豬肉香口又多汁，黑松露香氣濃郁，幾美味。

白松露味道較為低調，微微的香味。

香煎軟心芝士餃(7隻)，$58。

要了煎餃，本身係芝士控即叫左，內餡芝士豐富，有粒粒粟米增強口感又清甜味，不俗。

食物味道不俗，龍鳳松茸雙餃，黑白餃子，值得一試，服務態度幾好，下次有機再食。

太子荔枝角道1號嘉業大廈地下E號舖