Essence

好耐冇係東涌Essence食Buffet，記得以前去過都幾抵食，唔知而加質素如何呢?趁假日去一轉。今次主題係泰國水上市場自助餐，假日自助晚餐每位$460有7折，折扣後$322再加一，即係每位$354.2，吸引幾價格。

餐廳面積寬敞，坐位十分舒適，今次主題係泰國菜，即睇下有咩食。

熱盤。

冷盤，刺身自己夾。

限定之選區，泰菜主打有串燒、冬蔭功大頭蝦湯、海南雞飯、鹵水豬腳船麵。

燒蠔，好吸引呢。

頭盤。

Movenpick。

甜品區。

飲品區。

先來轉冷盤，長腳蟹鮮，味道不俗，螺有點韌，青口同蜆冇乜鮮味。

刺身有唔太新鮮，味道一般，係三文魚好點。

冬蔭功大頭蝦湯，本身Like冬蔭功必試下，個湯味道偏酸，少許辣，冇乜鮮味麻麻地。

鹵水豬腳船麵，呢個位比較多人排隊，都幾大碗，最好就係Share，湯底濃郁，鹵水豬腳肉質軟腍入味，味道不俗。

海南雞飯，賣相一般，雞肉好硬同冇味，個飯唔覺有油香，唔怪得冇乜人要。

串燒幾惹味。

烤鴨胸紅咖哩配荔枝，鴨胸口感軟腍，咖哩少辣有椰香，加上有荔枝味道清甜。

燒蠔，多人排隊之一，一次可以拎兩隻，蠔Size爭好遠，有隻實在太細粒了問可唔可以換，因為太細之下比多隻，燒蠔冇乜鮮味，友人仲要食到隻唔新鮮...

之後唔敢再拎了。

燒雞翼我鍾意食。

香蘭葉包雞，冇乜清香味，雞肉有少許似綿花雞的口感。

牛肉口感軟腍，正常水準。

羊鞍，唔夠惹味，羶味勁，肉質軟腍。

菠蘿雞粒炒飯，正常水準。
魚肉唔夠滑。

龍蝦湯，味道濃郁。

又到甜品時候，唔多選擇，冇乜泰國甜品，本身有椰汁西米糕，但之後再冇Refill...芒果黑糯米布甸，冇乜糯米味道太流，泰式奶茶奶凍，奶茶味淡，其他都係普遍會有的芝士蛋糕、椰子慕絲、窩夫、葡撻、抹茶紅豆卷及椰汁糕等，味道普通。

牛角酥窩夫，較有特色的甜品，賣相有點似雞蛋仔形，口感酥脆香口幾美味。

綿綿冰，有三色粉條作點綴及少許榴槤肉果下正，綿綿冰口感綿滑微甜。

Movenpick雪糕，試了四款口味，法式焦糖燉蛋好甜，士多啤梨酸酸地有果肉清新，意大利奶凍香甜及呍呢拿美味。

飲品尚算多選擇，甘荀汁幾好飲，咖啡都不俗呢。

主打的泰國菜食物味道一般，其他食物味道普通，感覺水準下降左，不復當年勇，環境就幾舒服，服務都算幾好，格價都真係幾平，滿足左食Buffet的口腹之慾，但如果真係想食好野就真係爭點，唔知轉左其他主題會唔會好點呢。

主題:泰國水上市場先助餐(2023年8月30日至10月3日)

自助晚餐

星期一至日及公眾假期 (下午6:30–下午9:30)

每位$460 

有7折有優惠

東涌文東路51號諾富特東薈城酒店大堂