吃什麼

 

放工約了Yan到中環食飯，最近仍然愛上食台灣野，今次到了出名的吃什麼，兩位台灣媽媽開設的台式店子，曾獲米芝蓮推介，講起吃什麼，除了「請坐」業權風波事件外(支持小店)，就會想起當年在西環的外賣便當店，果陣係果頭返工，有時會去幫襯，回起想都差唔多8年前了...。

黑色的門面，感覺型格，內堂的深藍色牆配銀色字招牌，好型又搶眼，牆上掛有店子的介紹及歷史，巨型的壁畫，據聞畫上是幫助過店子的恩人，甚有意義，另一邊是湖水綠的牆身，木系枱椅，感覺柔和。
大約7:00去到，時間尚早，唔洗位即有兩位。

餐牌，食物都幾多選擇，必食牛肉麵及蛋餅，同要了幾款小食。
點餐紙見到:繁忙時段用餐時間控制45分鐘內，不過果日唔太多人，職員冇叫我地限時，如果太多人大家都識做既www。

珍珠奶茶，$35，奶茶甜度適中，珍珠煙韌。

黑糖奶茶，$34，Yan的。

外省牛肉麵(半筋半肉)，$89，湯底味道濃郁，麵條煙韌，牛肉口感鬆化，牛筋入味爽彈，美味。

肉鬆蛋餅，$45，必食蛋餅，要了肉鬆餡，蛋餅口感香軟，配上肉鬆餡鹹鹹甜甜幾好味呢。

滷大腸，$48，口感有嚼勁好，咸香入味。

鹹酥雞，$49，入口酥脆，香口美味又多汁。

冇收加一，太抵了~食物味道不俗，價格合理，坐得幾舒服，服務態度有禮貌，開飯之選。

中環雲咸街75-77號嘉兆商業大廈地下A號舖