Billow

 

清假約了同Yan到Billow一轉，小白鷺餐廳，N年前去過兩次，一次去餐廳，一次去BBQ，果時仲要有得划船及餵羊仔等，改建後的Billow，感覺唔同左，以前優雅古典，而加清雅優美。

因為係平日的三點，初步相信唔多人膽粗粗去walk in，真係唔多人即時有兩位。

純白色歐陸建築的門面，旁有不少植物及盆栽，餐廳設有室內及室外，內堂以白色為主調，灰色梳化椅及雲石枱，感覺高雅，牆上盡是玻璃窗，可欣賞白鷺湖景觀，玻璃窗透射的陽光，感覺自然舒適。

室外有渡假之感。

餐牌，揀了下午茶。

Cappuccino，跟餐+$30，悠閒環境之下嘆啡感覺更好呢。

Ice Cappuccino，跟餐+$30，Yan的。

炸青衣魚柳‧薯條‧他他醬，$128，炸魚柳大件，入口鬆脆魚肉滑，不過冇乜鮮味，薯條正常水準。

自家手打牛肉漢堡‧薯條，$158，大份的漢堡，牛肉口感鬆化，香口惹味，味道不俗。

環境幽靜，坐得舒適，食物水準普通，格價略貴，不過環境取勝，食飽後周圍行下打卡，有種偽旅行之感，感覺relax呢。

行左一轉閃人，挑機行出去大埔墟當散步，影下沿途風景。

大埔大埔滘紅林路2號白鷺湖互動中心地下B號舖